“Plas Llanelly yw curiad calon Llanelli, yn adlewyrchu’r gwych a’r gwachul yn hanes y dref, ac a gofleidiodd y chwyldro diwydiannol a arweiniodd at ffyniant.”

Dechreuodd prosiect Plas Llanelly o ddifrif yn ystod cyfres ‘Restoration’ y BBC yn 2003, pan gyrhaeddodd yr adeilad y rownd derfynol, gyda chefnogaeth y coegwych Laurence Llewelyn Bowen sydd hefyd wedi ymddangos ar Who Do You Think You Are? ar y BBC gyda Griff Rhys Jones. Taniodd hynny’r syniad o drawsnewid y Plas yn Ganolfan Treftadaeth ac Achyddiaeth lle y gallwch ymchwilio eich llinach deuluol ac a fydd hefyd yn arddangos cymeriadau ysbrydoledig yn hanes Llanelli, ddoe a heddiw. Ers hynny a chyda buddsoddiad ariannol, ymchwil a llawer iawn o waith caled, tyfodd gweledigaeth y Plas yn brosiect a enillodd fri cenedlaethol. Bydd ei ailagor, a ddisgwylir ar ddechrau 2013, yn gamp o waith cymuned, archaeoleg, hanes, cadwraeth, adfer a medrau adeiladu traddodiadol, fydd yn atgyfnerthu hunaniaeth a threftadaeth ddiwylliannol Llanelli.

Trwy gydol ei hanes ôl-ganoloesol, bu Plas Llanelly yn ganolbwynt i fywyd y dref ac yn ganolfan sy’n galluogi pobl i olrhain eu gwreiddiau a dathlu eu llwyddiannau. Ac unwaith eto, daw yn Wyneb Llanelli, ac yn wir yn un o’r prif atyniadau i ymwelwyr yng Nghymru ac yn arwydd o obaith yn Sir Gaerfyrddin.

Gorffennol sy’n ymwneud â phobl, lle a hunaniaeth y dref – diwydianwyr byd-enwog, byd y boneddigion, peth o’r gwin cyntaf a fewnforiwyd gan Hardy’s, personoliaethau amlwg ym meysydd y celfyddydau, gwyddoniaeth, adloniant a diwydiant a llawer iawn mwy. Bydd ymwelwyr yn cael eu swyno gan y bensaernïaeth unigryw a chan dystiolaeth o dechnegau adeiladu newydd ers ei graidd Jacobeaidd. Gwelodd Plas Llanelly nifer o ychwanegiadau a gwelliannau trwy’r oesoedd, a gynhyrchodd yn y pendraw blasty Sioraidd trawiadol, yr oedd ei bwysigrwydd a’i diroedd yn llywio map y dref ei hun. Archwiliwch Blas Llanelly gyda ni wrth inni symud at ein hagoriad cyhoeddus fydd yn cynnwys un o’r arddangosiadau achyddiaeth mwyaf cyfoes yng ngwledydd Prydain a chyfleoedd i bobl o bob oed ymgolli yn y gorffennol, y presennol a’r dyfodol.

A gallwch chithau gyfrannu yn awr. Mae gennym lawer o gyfleoedd i wirfoddoli gyda thîm Plas Llanelly neu i ddod i weithdai fydd yn gyfle ichi ddod i wybod mwy am eich gorffennol. Ffoniwch y tîm ar 01554 772857 neu e-bostiwch ni yn y cyfeiriad a ddangosir.